Vetëm dy ditë pas publikimit nw Tirananews.al të skandalit me listat e përfituesve të fondeve të buxhetit të shtetit, për dëmet e shkaktuara nga tërmeti, dy specialistë të KLSH-së kanë mbërritur në Bashkinë e Matit dhe kanë nisur kontrollin e të gjitha dosjeve dhe dokumentave që kjo njësi ka përgatitur. Kanë qenë banorë të fshatrave të Macukullit e Derjanit si dhe punonjës të administratës së Bashkisë Mat ata që kanë vënë në dijeni KLSH-në për shkeljet e konstatuara, duke kërkuar vënien para përgjegjësisë ligjore të abuzuesve. Specialistët e ardhur nga kryeqyteti me siguri nuk do të ndalen vetëm të fondet e emergjencave për dëmtimin e banesave, ato do të kqyrin me hollësi gjithë aktivitetin ekonomik të kësaj bashkie, për vitin 2018. Do të “hetojnë” tenderat e zhvilluar, ligjshmërinë e tyre, lidhjet nepotike, publikimin në media, supervizioni, fillimi dhe mbarimi i punimeve, mbajtjen e dokumentave. Burime brenda bashkisë shprehen se abuzimet më të mëdha janë bërë me karburantin dhe hedhjen e zhavorit në rrugët e fshatrave. “Këto shkelje KLSH nuk ka për t’i kapur kurrë. Zhavorin e ka marrë lumi dhe askush nuk mund ta gjejë sa metër kub janë hedhur. Kjo shoqërohet edhe me harxhimin e karburantit për drejtuesit e punonjësit e administrates. Zhavori e nafta mbulojnë njëra-tjetrën”, thanë punonjës të Bashkisë Mat. Kontrolli do të përfshijë edhe menaxhimin e fondeve të tjera publike. Ka të dhëna se dokumentacioni i mbajtur nga drejtoritë në këtë bashki është plot parregullsi e shkelje ligjore. KLSH edhe herë tjetër ka gjetur shkelje në këtë bashki, por masat e dhëna nuk janë zbatuar. Madje thuhet se shumë nga zyrtarët e këtushëm kanë pasur probleme me organet e drejtësisë, por janë në poste të rëndësishme. Ndoshta KLSH heton edhe këtë abuzim të vendorëve të Matit.
Add A Comment