Delegacioni i BE në Tiranë hedh poshtë zërat se masat e marra për të frenuar hyrjet legale për azil lidhen me Shqipërinë. Ky reagim vjen pas deklaratave të Komisionerit të Bashkimit Evropian për Migrimin, Çështjet e Brendshme dhe Shtetësi, Dimitris Avramopoulos, i cili tha se BE do të marrë masa, po u shtuan hyrjet legale për azil. Lidhur me këtë deklaratë reagoi edhe presidenti i Republikës Ilir Meta i cili e cilësoi atë si këmbanë alarmi dhe kërkoi që të merren masa për të mos lejuar rikthimin e vizave për shqiptarët.
Në një prononcim për Shqiptarja.com Delegacioni i Bashkimit Europian hedh poshtë shqetësimin e ngritur nga presidenti Meta duke thënë se komenti i komisionerit nuk lidhet me ndonjë situatë në veçanti, madje përmend kontributin e Shqipërisë për uljen e numrit të kërkesave për azil.
“Në
kundërshtim me atë çka është raportuar, Komisioneri nuk ka komentuar mbi situatën
në ndonjë vend në veçanti, as nuk ka thënë se do të ndërmerret ndonjë veprim
kundër ndonjë vendi të caktuar në të ardhmen.
Në rastin e Shqipërisë, Komisioneri theksoi punën e vazhdueshme të autoriteteve
shqiptare, duke përmendur në mënyrë specifike kontributin e saj për uljen e
numrit të kërkesave për azil.
Ndërsa Komisioneri e bëri shumë të qartë se ka detyrime për t’u përmbushur dhe
rregulla për t’u ndjekur për të gjitha vendet pa viza në mbarë botën.
Komisioni do të bëjë çmos për të shmangur çdo pasojë negative për çdo vend pa
viza dhe se në rastin e Shqipërisë ai ka qenë në kontakt të ngushtë me
autoritetet për këtë çështje, edhe gjatë vizitës së tij të fundit në Shqipëri,
më 21 maj, për bërjen operative të marrëveshjes status midis Shqipërisë dhe Agjencisë
Evropiane të Rojave Kufitare dhe Bregdetare”, deklaron delegacioni i
BE.
Paraditen e sotme një reagim nga Londra, kryeministri Rama u shpreh se nuk ka asnjë për tu shqetësuar, dhe se Meta eshte bërë pjesë e frontit kundër zgjedhjeve dhe drejtësisë dhe e këshilloi të shqetësohet për vizën që i ka vënë institucionit që ai drejton.