Presidenti Ilir Meta tha më 20 mars 2019 nga Pogradeci se ishte i gatshëm që për të shpëtuar Shqipërinë, do të vriste veten si ish-presidenti i Kilit, Salvador Allende.
Por në të vërtetë, me dekretin nr. 11199 të datës 10 qershor 2019, jo vetëm nuk sakrifikoi veten për të shpëtuar Shqipërinë, por po sakrifikon Shqipërinë për të shpëtuar veten.
Dekreti nr, 11199 me firmën e Metës do të mbahet mend si dekreti presidencial që futi në vëllavrasje shqiptarët.
Shqiptarë! Deri sa presidenti dhe kryeministri ta gjejnë sërish gjuhën për një drekë apo darkë ngjalash, qëndrojini larg konfliktit për pushtetin e atyre atje lart.
Jeta e çdo shqiptari, qytetari të thjeshtë, militanti politik, opozitari apo polici, është më e shtrenjtë se çdo karrige pushtetari të korruptuar në këtë vend…
Në pamje është sulmi që i është bërë sot ne orën 11:00, KZAZ nr 66 në qytetin e Çorovodës nga mbështetësit e LSI-së.
Zoti president, si bashkëpatriot nga e njëjta zonë, po të kujtoj se pjesa dërrmuese e atyre qytetarëve që kanë mësyrë sot pallatin e kulturës që mban emrin e një shqiptari të madh dhe skraparlliu patriot, heroit te kombit “Riza Cerova”, si dhe atyre gjithsej 20 policëve që ka komisariati i Skraparit, në mos janë kushërinjtë e tu apo të mitë, jane kushërinj apo kanë lidhje gjaku me njëri-tjetrin.
Skrapari dhe skraparllinjtë nuk të detyrohen asgjë, përveç se të kanë votuar që nga viti 1992 dhe të kanë mbështetur sa herë që gjithë të tjerët të kanë braktisur.
Ata bashkëpatriotë që i ja sulur pallatit të kulturës “Riza Cerova” me urdhrin tënd dhe në zbatim të dekretit tënd, nuk ka nevojë të ndezin dhe një zjarr tjetër në këtë Shqipëri të shkrumbuar tashmë nga elita politike e korruptuar deri në palcë…
Ndërsa i ke vënë flakën vendit për karrigen e pushtetit tënd apo të Ramës, sëpaku kurseja një zjarr më pak vendlindjes tënde, Skraparit….