Tre persona janë prangosur nga policia e Korçës, pasi po konfliktoheshin për motive të dobëta me njëri-tjetrin dhe nuk iu bindën urdhrit të policisë.
Mbrëmjen e djeshme në lagjen nr 18 në Korçë, në një lokal, këto tre persona me inicialet A.S, 27 vjeç; A.Xh, 41 vjeç dhe L.M, 40 vjeç po konfliktoheshin me njëri-tjetrin.
Sipas policisë, tre të arrestuarit banues në Korçë, kundërshtuan dhe nuk iu bindën urdhrit të tyre, gjatë ndërhyrjes për neutralizimin e situatës dhe për shoqërimin e tyre drejt ambjenteve të Komisariatit.
Tre personat e lartpërmendur, u arrestuan në flagrancë për veprat penale “Kundërshtimi i punonjësit të policisë së rendit publik” dhe “Mosbindja ndaj urdhrit të punonjësit të policisë së rendit publik, të kryera në bashkëpunim”.
Materialet në ngarkim të tyre i kaluan Prokurorisë të Rrethit Gjyqësor Korçë për veprime të mëtejshme.