Kreu i bashkisë së Çorovodës, Nesim Spahiu në një tjetër letër drejtuar Komisionit Qendror të Zgjedhjeve, teksa ka përsëritur qëndrimin për moslejimin e KZAZ-ve në zbatim të dekretit të Presidentit Meta për anulimin e zgjedhjeve, i bën me dijeni institucionit se kanë anuluar edhe vendimin për vendndodhjen e Qendrave të Votimit.
“Kam shfuqizuar/anuluar aktin administrativ me të cilin kam caktuar vendndodhjen e Qendrave të Votimit (QV) në territorin e bashkisë. Në ambientet ku ishin planifikuar të vendoseshin QV- që janë në pronësi/administrim të njësisë së qeverisjes vendore, nuk do të lejohet vendosja e asnjë materiali zgjedhor. Ato do të ruhen me punonjës të strukturave të njësisë së qeverisjes vendore, që kanë përgjegjësinë për të mos lejuar hapjen e tyre pa autorizim paraprak nga Kryetari i njësisë së qeverisjes vendore. Në datën 29-30 Qershor 2019, këto ambiente do të jenë në dispozicion të qytetarëve për aktivitete të ndryshme artistike, kulturore dhe letrare, që do të organizohen nga njësia e qeverisjes vendore, apo për tubime që do të organizohen në përputhje me të drejtën kushtetuese të lirisë së tubimit, sipas nenit 47 të Kushtetutës”, thuhet në letrën e kryebashkiakut të Çorovodës, Nesim Spahiu drejtuar KQZ-së, dhe për dijeni komisariatit të policisë Skrapar dhe misionit vëzhgues të OSBE-ODIHR.
Krahas kësaj, kryebashkiaku bën të ditur se ka anuluar edhe aktin administrativ që i ka dërguar KQZ-së për vendndodhjen e qendrave të votimit në ambiente private, që nuk janë në pronësi apo administrim të njësisë vendore, si dhe do të njoftojnë pronarët e ligjshëm të këtyre ambienteve për këtë vendim.
Gjithashtu është anuluar dhe lista e zgjedhësve që i është dërguar KZAZ-së, “në kohën kur Dekreti i Presidentit të Republikës ishte në fuqi për organizimin e zgjedhjeve në 30 Qershor”.
Ne te njejten linje i kane derguar shkrese dhe disa kryebashkiake te tjere qe drejtohen nga opozita.
LETRA E PLOTË E KRYEBASHKIAKUT TË SKRAPARIT, NESIM SPAHIU



