Një darkë që u kthye në një sherr me thyerje gotash e pjatash ka qenë ajo mes ish administratorit të Digitalb, Alban Jahos dhe drejtorit të Top Channel, Ben Blushi.
Siç raporton Newsbomb, ata kanë qenë duke darkuar në shoqërinë e pronarit të tv Klan, Aleksandër Frangaj dhe biznesmenit Samir Mane. Të pranishmit në restorant nuk e kuptuan se si nisi sherri por u trembën teksa konflikti degjeneroi dhe në thyerjen e gjithçkaje që ndodhej në tavolinë, aq sa dikush prej tyre ka lajmëruar edhe policinë.
Dëshmitarët në restorant tregojnë se në një moment të caktuar, gota e pjata kanë fluturuar në drejtim të dy palëve, ndërkohë që dy biznesmenët Frangaj e Mane kanë dashur të shuajnë sherrin. Deri në orën 01:00 pas mesnate, edhe vetë prokurorët kanë qenë në vendngjarje, por pa shoqëruar asnjë prej tyre.
Dëshmitarët nuk kanë dëgjuar sesi ka filluar sherri mes Blushit dhe Jahos, por dihet tashmë, se pas ardhjes së Ben Blushit si drejtor në TCH, Alban Jaho u shkarkua nga administrator i Digitalb.
Ndoshta takimi mes tyre mund të ketë qenë për pajtimin e palëve. Që siç duket, nuk ka rezultuar e suksesshme. Asnjëri nga palët nuk është shoqëruar në polici, por sherri i madh prej disa minutash, është filmuar edhe nga kamerat e restorant Padam, që sipas informacioneve, janë marrë edhe nga policia.