Kryeministri Rama gjen kohën edhe të ironizojë me anëtarët e Komisionit Hetimor për Inceneratorët ndërkohë që është duke dhënë dëshminë e tij para këtij komisioni. Këtë herë, ai i është drejtuar me një sens ironik deputetit të PD Lefter Gështenja, duke bërë një batutë me të për mbiemrin e tij.
Ndërkohë që Kryeministri ishte duke u pyetur nga kryetarja Jorida Tabaku në lidhje me 100 milionë euroshin, ai i kthehet deputetit Gështenja duke i thënë “më lejo të thyej këto arrat e mia njëherë”.
Rama: E ka dhe këtë zërin… Ne do përqendrohemi te lekët, se këtu është problemi. Këto a e njoh unë ligjin apo jo, janë tema tjera. Do përqendrohemi te lekët, se keni bërë hajgare gjithë këto muaj. Sot do i provoj shqiptarëve se kjo është aritmetika e delegatëve.
Plehrat përpunohen me para, jo pa para. Nuk kemi gjetur asnjë model në botë që të përpunojë plehra pa para. Ka pasur një model dhe qenë modeli i qeverive paraardhëse, po e them në shumës. Si je z. Gështenja, më lejo të thyej këto arrat e mia njëherë. Ai po qesh mo, është i lumtur.
Tabaku: Nuk më duket normale që kryeministri vjen e merret me secilin.
Rama: Ai po qesh mo, ju duket normale që kur dëshmitari flet, t’i flasin nga salla.