Gjykata e Krimeve të Rënda ka vendosur datën 10 mars për të marrë vendimin për dosjen “Tahiri” duke pranuar kështu kërkesën e ish ministrit të Brendshëm.
Tahiri ankimoi zgjatjen e afatit nga Prokuroria, dhe pas përfundimit të seancës tha se kësaj maratone i ka ardhur fundi.
“Kam pasur durim dhe kam ende durim pa u shqetësuar për asnjë çast, ashtu siç kam forcën për ti shpjeguar më në fund të gjithë qytetarëve, dhe atyre që me kanë besuar duke i falenderuar dhe atyre që ndoshta kanë dyshuar te unë, të vërtetën time deri në gërmën e fundit. Më vjen mirë që jam në këtë moment. Unë di që gjykata më dha të drejtë, kjo histori nuk mund të zgjasë pa fund. Deri në 10 mars koha numërohet mbrapsht. Nuk e shoh si lojë golash, po e shoh si mundësinë time për të marrë drejtësinë që më takon. Kam mbajtur mbi kurriz padrejtësisht akuza nga më të rëndomtat dhe më skandalozet, ashtu siç për një vit e ca kam pritur pa folur që drejtësia të flasë”, tha ai.
Tahiri duke folur për drejtësinë tha se kur zgjatje pa fund ndodhin me të që ka mundësi të flasë “merre me mend ca skandalesh bëhen me njerëzit e thjeshtë që përplasen në dyert e drejtësisë”.
I pyetur nëse do të rikthehet në politikë, ai tha se ka kohë për të gjitha.