Ministrja e Arsimit, Evis Kushi ka sqaruar se ditën e martë, 6 dhjetor, mësimi në shkollat e Tiranës do të vijojë normalisht dhe nuk do të shoqërohet me ndërprerje.
Ky shpjegim vjen pas paqartësive të qytetarëve nëse do të zhvillohet apo jo procesi mësimor në kryeqytet, pasi më datë 6 do të mbahet samiti i BE-së dhe liderët evropianë do të vijnë në kryeqytet.
“E detyruar nga pyetja e vazhdueshme “A do jenë pushim shkollat në datën 6?” po e ripërsëris se ditën e martë, datë 6 dhjetor, mësimi do të vijojë normalisht në të gjitha shkollat e Tiranës. Samiti BE-Ballkani Perëndimor, i cili do të mbahet në Tiranë më 6 dhjetor është një ngjarje e jashtëzakonshme dhe historike për Shqipërinë. Për herë të parë, të gjithë liderët e BE-së mblidhen në një vend jashtë BE-së për një samit të Këshillit Evropian. Ky është nder dhe vlerësim i madh për vendin tonë, por s’ka arsye për të ndaluar procesin mësimor. Madje i ftoj të gjithë mësuesit, në të gjithë vendin, që ta shfrytëzojnë këtë ditë kaq të veçantë për të ndarë me nxënësit opinionet për rrugëtimin e vështirë evropian të atdheut tonë. Ndjesë për të gjithë ata që mund të jenë keqinformuar nga media të ndryshme, rrjetet sociale apo burime të tjera jozyrtare dhe mësim të mbarë”, njoftoi ministrja.