Presidenti Bajram Begaj ka dekretuar sot datën 9 nëntor për zhvillimin e zgjedhjeve të pjesshme në gjashtë bashki pa kryetar, përfshirë edhe Tiranën. Ky vendim vjen ndërkohë që ish-kryebashkiaku Erion Veliaj ka bërë ankimim në Gjykatën Kushtetuese për të kundërshtuar shkarkimin e tij nga detyra.
Juristi Kreshnik Spahiu, në një emision televiziv, u shpreh se zgjedhjet në Tiranë mund të pezullohen vetëm nga një vendim i Gjykatës Kushtetuese. Ai theksoi se institucioni i vetëm që ka të drejtën të ndalojë përkohësisht procesin është Kushtetuesja, e cila duhet të flasë vetëm përmes vendimeve.
“Unë e vlerësoj situatën si një ping-pong gjykatash, të gjithë janë pjesë e lojës. Pezullimi i zgjedhjeve është akt juridik kushtetues dhe mund ta bëjë vetëm Gjykata Kushtetuese. Prisja që ajo të pezullojë zgjedhjet, por kjo nuk ndodhi. Nëse Veliaj i drejtohet gjykatës për një masë të përkohshme, atëherë Kushtetuesja është e detyruar të shprehet për pranimin ose jo të pezullimit,” tha Spahiu.
Sipas tij, presidenti nuk duhej të tregonte se kujt gjykate t’i drejtohej Veliaj, pasi kjo është kompetencë që përcaktohet vetëm nga Gjykata Kushtetuese.