Altin Basha i cili nga sot është drejtor i Teatrit Eksperimental , ka shpjeguar arsyet e largimit nga spektakli “Portokalli”. Ai deklaroi në ABC se e ka parë largimin si një hapësirë lirie, për sa kohë kjo liri cenohej duke bërë që arsyeja pse drejtonte këtë spektakël humori të binte.
Ai deklaroi se eksperiencën që mori nga 17 vite në drejtim të këtij programi do ta vërë në jetë në një tjetër projekt për të cilin nuk dha një datë të saktë por theksoi se mund të nisë në mes ose në fund të mandatit në krye të Teatrit Eksperimental (mandati zgjat 3 vite).
Basha foli edhe për kauzën e Teatrit duke deklaruar se e ka parë projektin të cilin e cilësoi si godina e ndërtuar pas 100 vitesh e që do i shërbejë shqiptarëve, ndoshta në 200 vitet e ardhshme.
Pjesë nga biseda me gazetarin Endri Xhafo
Pse u larguat nga Portokallia?
Është shumë shpejt për të folur në detaje por ky vendim që e kam marrë pas 17 vitesh do ta jap një përgjigje. Unë nuk kam ndërmend të ushqej thashethemet. E kam parë si një hapësirë lirie. Në momentin kur kjo liri cenohet, arsyeja pse drejtoja Portokallinë ra. Është një kontribut që mendoj se me kohën do të vlerësohet më shumë. Nuk mendoj fare që do të bjerë Portokallia pas ikjes sime. Do duhet të presim për të parë. I uroj suksese atyre që janë atje. Nuk e kam bërë vetëm punën, ka qenë një punë grupi. Kam qenë i privilegjuar që kam punuar me një grup të rinj.
Për të bërë një portokalli në një vend tjetër?
Ndoshta
Nëse nuk do të ishin arsyet do të ishit larguar nga Portokallia?
Jo. Në fund të mandatit ose edhe në mes mund të krijoj një projekt. Ajo që mund të them është se kam krijuar një eksperiencë fantastike atje. Ajo eksperiencë e krijuar pa dyshim që diku do të shprehet.
A do vazhdojnë artistët të jenë të përçarë për Teatrin?
Ajo lloj përçarje nuk ekziston. Mendoj që nuk është problem themelor në komunikim. Ligjet e punës janë të tjera, bindjet politike janë të tjera.
Keni padurim për të parë Teatrin e ri?
Unë e kam parë projektin. Unë mendoj se është dashur të theksohet se po ndërtojnë një Teatër Kombëtar pas 100 vitesh. Kemi pasur një ndërtesë të adoptuar. Do kemi një teatër që do i shërbejë shqiptarëve ndoshta në 200 vitet e ardhshme.