Shtohen dyshimet për qarkullimin e variantit “Omicron” edhe në vendin tonë. Sinjalet vijnë nga terreni dhe niveli real i sëmundshmërisë në këtë periudhë.
Kreu i Urgjencës Kombëtare, Skënder Brataj thotë për A2 se shumë qytetarë nuk kërkojnë më kryerjen e tamponit dhe as ndihmën e urgjencës, në ditët e para të sëmundjes që ngatërrohet me gripin.
Mbarë bota po i trembet variantit të ri për shkak të transmetueshmërisë së lartë dhe frikës së kolapsit në spitale.
Komiteti i ekspertëve pritet të mblidhet këtë javë për të diskutuar masat anti-Covid në prag të festave dhe me rrezikun e ri, “Omicron”. Për Bratajn kufizimet shtesë do të ishin të kota nëse nuk zbatojmë masat në fuqi.
Referuar të dhënave zyrtare, ditët e fundit infektimet nga koronavirusi kanë pësuar rritje, situatë që në spitale reflektohet javë më vonë. Ndërkohë Instituti i Shëndetit Publik ende nuk ka konfirmim zyrtar nga Gjermania për praninë e Omicron në vendin tonë.