Menjëherë pas përfundimit të javës së 25-të të Abissnet Superiore, vëmendja e të gjithëve ka shkuar tek përballjet e ardhshme të vlefshme për javën e 26-të të kampionatit shqiptar.
Vlen të theksohet se ndeshje mjaft interesante dhe të luftuara do të luhen këtë fundjavë, përkatësisht të shtunën dhe të dielën.
Kështu, ditën e shtunë, në orën 13:45 do të luhen dy sfidat e para. Kastrioti-Partizani do të vihen përballë në Kamëz. Demat do të kërkojnë rikthimin te fitorja, ndërsa krutanët tentojnë vazhdimësinë pas fitores ndaj Teutës.
Sfida tjetër është ajo mes Egnatias dhe Vllaznia, që do të luhet në Rrogozhinë në stadiumin “Arena Egnatia”. Shkodranët duan të bëjnë autokritikën pas humbjes në klasiken e Shqipërisë, ndërsa rrogozhinasit e Ramadanit kërkojnë pikët e mbijetesës.
Në orën 16:45 është rezervuar derbi mes Tiranës dhe Dinamos që për shkak të mbylljes së “Air Albania” për punimet që do bëhen për Conferencë League, kjo përballje pritet të zhvillohet në “Elbasan Arena”. Blutë nuk kanë rrugë tjetër përveç 3 pikëve për tu larguar nga zona e ftohtë, ndërsa bardheblutë duan qetësinë për kreun.
Dita e diel ka rezervuar dy takimet e tjera që do të luhen në dy orare të ndryshme. Në Laç, kurbinasit do të presin Teutën prej orës 13:45, ku të dyja skuadrat kërkojnë fitoren përballë njëra tjetrës për të mos rrezikuar më shumë në objektivat e tyre.
Takimi i fundit do të luhet në Korçë mes Skënderbeut dhe Kukësit prej orës 16:45. Një përballje interesante mes dy skuadrave, me verilindorët që përballë do të kenë ish-trajnerin e tyre Skënder Gegën që në krye të korçarëve kërkon pikët e mbijetesës.
Ndeshjet e javës së 26-të:
Të shtunën
13:45 / Kastrioti-Partizani / Stadiumi Kamëz
13:45 / Egnatia- Vllaznia / Stadiumi “Arena Egnatia”
16:45 / Tirana-Dinamo / Mbetet të konfirmohet
Të dielën
13:45 / Laçi-Teuta / Stadiumi i Laçit
16:45 / Skënderbeu-Kukësi / Stadiumi Korçë.