Agjencia Kombëtare e Punësimit dhe Aftësive organizoi sot aktivitetin për promovimin e shkollës së Mesme Profesionale në qytetin e Bulqizës.
Takimi synonte prezantimin e ofertës për Arsimin dhe Formimin në Rajon dhe ishin të ftuar Kryetari i Bashkisë Bulqizë dhe përfaqësues nga bashkia, përfaqësues të institucioneve kryesore vendore, përfaqësues nga Agjencia Kombëtare e Punësimit dhe Aftësive, përfaqësues nga biznesi që vepron në Rajon dhe Ish-nxënës të kësaj shkolle.
Në fjalën e tij kryetari i bashkisë, Lefter Alla theksoi se bashkia ka mbështetur në mënyrë të vazhdueshme shkollat profesionale, duke mundësuar bursa për nxënësit e regjistruar në këtë shkollë.
Gjithashtu Alla vlerësoi mundësinë qe ju jepet të rinjve të dalin nga kjo shkollë më një diplomë të vlefshme dhe e cila ju siguron një vend pune në treg.
Shkolla e Mesme Profesionale “Nazmi Rushiti” është një ndër shkollat e para profesionale në vend. Shkolla profesionale Bulqizë, si filial i kësaj shkolle u rihap në shtator të 2014, me mbështetjen e Ministrisë së Çështjeve Sociale dhe Punës, e cila u erdhi në ndihmë përgatitjes së punonjësve të kualifikuar në drejtimin Minierë dhe Gjeologji, me synimin për të përgatitur stafe të specializuara për minierën e Bulqizës, por jo vetëm.
Kjo shkollë ofron edhe drejtime të tjera si Teknologji ushqimore, me profile të ndryshme specifike, Shërbime sociale dhe shëndetësore të ndarë në disa profile, si dhe profilet ekonomike të paprekura akoma në masë.
