Deputeti i Partisë Demokratike Agron Gjekmarkaj shpjegoi në emisionin ‘Now’ në Euronews Albania pozicionimin e tij publik në krah të Berishës në konfliktin e gjatë ku është përfshirë PD.
Ai tha se tryeza e përbashkët ishte për të krijuar një strategji të përbashkët opozitare përballë qeverisë dhe domosdshmëri në kushtet kur opozita e përçarë po ndihmonte qeverinë.
“Në këto dy vite kemi konsumuar vërtetë shumë emocione negative, kemi thënë fjalën e fundit, kemi qenë emocionalë, jemi përfshirë në beteja vëllavrasëse dhe të gjitha kanë çuar në një copëzim të opozitës dhe humbje të seriozitet përballë opinionit publik. Duke parë gjendjen e opozitës që e fragmentarizuar po e ndihmon shumë qeverinë, duke bjerrë misionin tonë kryesor është momenti i fundit që kushdo ndjen një përgjegjësi për të shfrytëzuar çdo mundësi për ta ringritur PD. Basha është ftuar në tryezën e përbashkët dhe nuk ka pranuar. Kjo tryezë ishte për të krijuar një strategji të përbashkët opozitare”, tha Gjekmarkaj.