Deputeti Agron Malaj u është drejtuar nëpërmjet një mesazhi në rrjetet sociale votuesve të Qarkut Dibër, duke i falenduar për mbështetjen masive dhe duke u premtuar se do të jetë pranë tyre.
“Nga zemra e Matit, ku më keni besuar për dy mandate drejtimin e bashkisë, sot e vazhdoj këtë rrugëtim në një mision më të madh – përfaqësimin e gjithë qarkut Dibër në Kuvendin e Shqipërisë.
Ky është mandati im i parë si deputet, por jo kontakti im i parë me punën dhe sfidat e njerëzve të kësaj zone. Jam krenar për besimin që më dhatë dhe i vendosur ta kthej atë në punë konkrete, në zë të fuqishëm për gjithë qarkun Dibër, në projekte që mbajnë gjallë shpresën dhe zhvillimin e vendlindjes sonë.
Me përulësi dhe vendosmëri, do të jem aty ku duhet – pranë njerëzve, duke e çuar zërin tuaj atje ku merren vendimet që prekin jetën tonë. Qarku Dibër e meriton të jetë gjithmonë në qendër të vëmendjes. Ky është premtimi im për ju!“
