Një aksident rrugor është regjistruar në autostradën Lushnjë–Fier, ku dy automjete janë përplasur me njëri-tjetrin. Si pasojë e përplasjes, drejtuesi i njërit prej mjeteve është plagosur dhe është transportuar me urgjencë në Spitalin e Lushnjës, ku po merr ndihmën mjekësore.
Sipas informacioneve paraprake, drejtuesi i një automjeti tip Volkswagen ka hyrë në kryqëzim nga rruga dytësore pranë zonës së njohur si “Pushimi i Shoferit” në Divjakë, ndërsa një minifurgon që po udhëtonte në drejtim të Fierit nuk ka mundur të shmangë përplasjen.
Policia Rrugore ka mbërritur menjëherë në vendngjarje dhe po punon për disiplinimin e trafikut, i cili është rënduar duke krijuar radhë disa kilometra në korsinë drejt Fierit.
Sipas mjekëve, drejtuesi i automjetit tip Volkswagen ndodhet jashtë rrezikut për jetën.
Kryqëzimi pranë “Pushimit të Shoferit” konsiderohet prej kohësh një nga pikat problematike të autostradës Lushnjë–Fier. Banorët dhe drejtuesit e mjeteve kanë ngritur vazhdimisht shqetësimin për mungesën e mbikalimeve, investim që ende nuk është realizuar që prej ndërtimit të kësaj autostrade.