Një aksident rrugor është regjistruar mëngjesin e së premtes në kryqëzimin e rrugëve “Onhezmi” dhe “Skënderbeu” në Sarandë.
Sipas informacioneve paraprake, një automjet tip Mercedes-Benz, i drejtuar nga shtetasi francez Yacine Mechmache, ka humbur kontrollin gjatë lëvizjes, duke dalë nga karrexhata dhe duke u përplasur me barrierat mbrojtëse anësore të rrugës.
Nga aksidenti nuk ka persona të lënduar, ndërsa janë shkaktuar vetëm dëme materiale në automjet dhe në infrastrukturën rrugore.
Në vendngjarje kanë mbërritur shërbimet e Policisë Rrugore të Sarandës, të cilat kanë kryer veprimet procedurale dhe testin e alkoolit ndaj drejtuesit të mjetit.
Testi ka rezultuar 0.00 mg/l, duke përjashtuar konsumimin e alkoolit. Policia po vijon hetimet për të përcaktuar shkaqet dhe rrethanat e aksidentit.