Një aksident zinxhir është regjistruar mëngjesin e kësaj të shtune në autostradën “Ibrahim Rugova”, rreth dy kilometra larg pikës kufitare të Morinës.
Sipas informacioneve paraprake, disa automjete që po lëviznin në drejtim të Shqipërisë janë përplasur, duke lënë të lënduar gjashtë persona. Mes tyre ndodhen edhe një fëmijë dhe një grua shtatzënë.
Të lënduarit janë dërguar për trajtim mjekësor në Spitalin e Prizrenit, ndërsa në vendngjarje kanë mbërritur njësitë e Policisë së Kosovës, të cilat po hetojnë shkaqet dhe rrethanat e aksidentit.
Për shkak të përplasjes, njëra korsi e autostradës në drejtim të Shqipërisë është bllokuar përkohësisht, duke shkaktuar kolona të gjata automjetesh. Në rëndimin e trafikut ka ndikuar edhe fluksi i lartë i lëvizjeve drejt bregdetit shqiptar gjatë fundjavës.