Pas një aksidenti tragjik të ndodhur në Sauk dy ditë më parë, që i mori jetën tre të rinjve dhe plagosi tre persona të tjerë, drejtori i Policisë së Shtetit, Muhamet Rrumbullaku ka urdhëruar të gjitha shërbimet e Policisë Rrugore, në të gjithë vendin, të kalojnë në shërbim të përforcuar, duke rritur prezencën e punonjësve të Policisë dhe të mjeteve logjistike, në akset rrugore.
Në njoftimin për mediat, bëhet me dije se të gjitha makinat inteligjente dhe pajisjet bashkëkohore që Policia disponon, si radarët automatikë, dronët, kamerat dhe mjetet e pauniformuara, do të vijojnë të jenë në funksion 24/7, me tri turne, në të gjitha rrugët e vendit.
“Me qëllim rritjen e parametrave të sigurisë rrugore, Drejtori i Përgjithshëm i Policisë së Shtetit ka urdhëruar që prej orës 21:00 të mbrëmjes së djeshme, të gjitha shërbimet e Policisë Rrugore, në të gjithë vendin, të kalojnë në shërbim të përforcuar, duke rritur prezencën e punonjësve të Policisë dhe të mjeteve logjistike, në akset rrugore.
Të gjitha makinat inteligjente dhe pajisjet bashkëkohore që Policia disponon, si radarët automatikë, dronët, kamerat dhe mjetet e pauniformuara, do të vijojnë të jenë në funksion 24/7, me tri turne, në të gjitha rrugët e vendit”, thuhet në njoftim.