Viti 2025 ka nisur me ulje të ndjeshme të numrit të aksidenteve rrugore. Pas janarit, edhe shkurti ka shënuar më pak aksidente sesa e njëjta periudhë e vitit të kaluar. Sipas INSTAT, në muajin shkurt kanë ndodhur 88 aksidente rrugore në Shqipëri duke rezultuar në 122 persona të aksidentuar, përfshirë të vrarë dhe të plagosur.
Gjatë periudhës janar-shkurt 2025, numri i aksidenteve rrugore ka pësuar një ulje prej 21,1%, krahasuar me të njëjtën periudhë të vitit të kaluar. Në 81,8% të aksidenteve, shkaqet kryesore janë të lidhura me sjelljen e drejtuesve të mjeteve. Grupmoshat më të prekura nga aksidentet janë ata të moshave 25-34 vjeç dhe 45-59 vjeç, duke zënë secila nga 23,9 % të numrit të aksidenteve.
Dita e enjte ka regjistruar numrin më të lartë të aksidenteve gjatë muajit shkurt, me 20,5%, ndërsa dita e diel ka qenë dita me numrin më të ulët të aksidenteve, me 9,1%. Numri më i lartë i aksidenteve ka ndodhur përgjatë harkut kohor 19:00-24:00, duke zënë 19,3% të aksidenteve gjithsej.
Pavarësisht uljes së numrit të aksidenteve në krahasim me vitin e kaluar, akoma mbeten shumë faktorë që kërkojnë vëmendje për të reduktuar më tej numrin e aksidenteve dhe për të rritur sigurinë rrugore.