Policia e Durrësit bën të ditur se është arrestuar drejtuesi i trajlerit i cili aksidentoi për vdekje 25-vjeçaren pasditen e të enjtes në portin e Durrësit.
Arkineda Haskasa, punonjëse e Portit u tërhoq zvarrë nga mjeti i rëndë duke humbur dhe jetën, ndërsa shoferi 39-vjeçar nga Kosova është vënë në pranga.
NJOFTIMI I PLOTE
Arrestohen në flagrancë 2 shtetas, për vepra të ndryshme penale.
Specialistët për Hetimin e Krimeve në Komisariatin e Policisë Shijak, në vijim të punës për parandalimin e përshkallëzimit të dhunës në familje, arrestuan në flagrancë shtetasin S. B., 26 vjeç, banues në Sallmone, pasi ka ushtruar dhunë fizike dhe psikologjike ndaj bashkëshortes së tij.
Specialistët e Qarkullimit Rrugor në Drejtorinë Vendore të Policisë Durrës arrestuan në flagrancë shtetasin F. K., 39 vjeç, banues në Malishevë, Kosovë, pasi më datë 07.01.2021, në ambientet e portit, duke drejtuar mjetin tip “Man” (trailer), ka aksidentuar shtetasen A. H., 25 vjeçe, e cila për pasojë ndërroi jetë.
Materialet i kaluan Prokurorisë së Rrethit Gjyqësor Durrës, për veprime të mëtejshme.