Autoriteti Kombëtar për Sigurinë Kibernetike, përmes një njoftimi zyrtar ka rrëzuar pretendimet e “Homeland Justice” për sulm kibernetik të institucioneve shqiptare.
Në njoftim shkruhet se materiali që po qarkullon është komunikim zyrtar i AKSK drejt infrastrukturave kritike të informacionit. Pra, nuk është një komunikim i klasifikuar.
“Autoriteti Kombëtar për Sigurinë Kibernetike (AKSK) sqaron opinionin publik se pretendimet e publikuara së fundmi mbi një komprometim të institucionit tonë, janë të pavërteta.
Materiali i qarkulluar përbën një komunikim zyrtar të AKSK drejtuar infrastrukturave kritike dhe të rëndësishme të informacionit, në kuadër të bashkëpunimit institucional, dhe nuk është komunikim i brendshëm.
AKSK vijon të operojë normalisht dhe mbetet e përkushtuar në garantimin e sigurisë kibernetike, si dhe në informimin e saktë dhe transparent të publikut.
Për çdo informacion zyrtar, qytetarët dhe mediat ftohen të referohen vetëm në kanalet zyrtare të AKSK“, thuhet në njoftimin zyrtar.
Përveç AKSK-së, reagime më herët pati dhe nga Prokuroria e Përgjithshme dhe Gjykata e Lartë.
“Për shkak të interesit në lidhje me hakerimin e mundshëm të faqes zyrtare së Prokurorisë së Përgjithshme, ju bëjmë me dije se nga verifikimet e kryera nga eskpertet e sigurisë së IT-së nuk janë konstatuar gjurmë kompromentuese deri në momentin që flasim në formën hakerimit. Stafet tona të IT-së janë duke monitoruar në mënyrë të vazhdueshme situatën“, u njoftua nga Prokuroria.
“Në lidhje me interesimin tuaj, ju bëjmë me dije se Gjykata e Lartë nuk ka pësuar sulm kibernetik. Sipas pretendimeve të grupit Homeland Justice në Telegram, është sulmuar faqja gjykata.gov.al, e cila është nën menaxhimin e plotë të Këshillit të Lartë Gjyqësor, dhe kjo nuk ka asnjë lidhje me sistemin e brendshëm apo faqen zyrtare“, njoftoi Gjykata e Lartë.
Këtë vit, u raportuan sulme kibernetike nga ky grup ndaj sistemit të Kuvendit të Shqipërisë dhe Postës Shqiptare. Më herët, në 2025-ën, ata nxorrën jashtë funksionit faqen e Web-it të bashkisë Tiranë.
Në vitin 2022, sulmuan shërbimet online në Shqipëri. Këto u bënë shkak që qeveria shqiptare të ndërpriste asokohe marrëdhëniet diplomatike me shtetin e Iranit duke dëbuar përfaqësinë diplomatike që ndodhej në Shqipëri, si përgjigje ndaj sulmit kibernetik.