Disa prej organizatorëve të protestës kanë kritikuar kreun e Partisë “Mundësia”, Agron Shehaj, duke kërkuar që protestuesit të distancohen prej tij.
Aktivisti Dritan Sela, i cili sipas tij numëron rreth 5 milion ndjekës në rrjetet sociale, ka përdorur tone të forta ndaj Shehajt, duke e cilësuar atë si “të paqëndrueshëm”, “pa shtyllë kurrizore” dhe “kalë troje”.
Sela ka deklaruar se strategjia që, sipas tij, po ndjek Shehaj ngjan me atë të Sali Berishës në vitet ’90, duke e lidhur me periudhën e lëvizjes studentore.
“Sali Berisha ishte ai që na vodhi ëndrrën në ’90. Ka dalë një Berishë tjetër, plani i Sali Berishës dhe Edi Ramës është ta çojnë deri në fund grabitjen e tokave shqiptare, ndaj na kanë ofruar një njeri të dyshimtë që ta pranojmë në krye, një njeri krejt të dyshimtë si Agron Shehaj, i cili vetëofrohet në protestë dhe po përpiqet ta shfrytëzojë protestën jo për qëllimet e saj, por për ata që e kanë vendosur. Ai është kalë i Trojës së sistemit”, është shprehur Sela.
Ai u ka bërë thirrje protestuesve që të distancohen nga Shehaj:
“Je i dyshimtë, po përpiqesh të përdorësh emocionet e njerëzve. I lutem të gjithë protestuesve, t’i rrinë larg një fytyre të dyshimtë si Agron Shehaj. Distancohuni prej tij. Koha ta pastrojmë vendin nga njerëzit e dyshimtë”, ka thënë ai.
Ndërkohë, Agron Shehaj ka qenë më herët në qendër të kritikave edhe për deklaratat e tij lidhur me investitorët strategjikë, ku është shprehur se shteti shqiptar duhet t’u “shtrojë tapet të kuq”.