Për akuzat lum nga opozita për projektin e portit të ri të turistik të Durrësit, kryeministri Edi Rama, thotë se ky investim do ta transformojë Durrësin në një ndër destinacionet kryesore turistike të Mesdheut.
Përmes një postimi në Twitter, Rama thekson dhe i jep mesazhin durrsakëve, që ose do të jenë me këtë projekt që e çon Durrësin në majë, ose më ata (opozita) në plehra.
“Armiqësia kundër investimit më të madh në rajon, i cili do ta transformojë Durrësin në një ndër destinacionet kryesore turistike të Mesdheut, duhet t’iu shërbejë të gjithë durrsakëve për të parë fytyrën e armiqve të së ardhmes së Durrësit; o me Durrësin në majë o me ata në plehra“,-shkruan Rama.
Partia Demokratike dhe Partia e Lirisë, thonë se pas projektit fshihet një aferë korruptive. Sipas Berishës, në të janë përfshirë që nga Presidenti i Bjellorusisë, Alexander Lukashenko, ai i Serbisë Aleksandar Vuçiç, por edhe ish-kreu i PD, Lulzim Basha.
Kompania pretendon se do të investojë 2 miliardë euro për ndërtimin e portit, apartamenteve dhe hoteleve. Në marrëveshje, ndër të tjera, parashikohet një arkëtim prej 3,2 miliardë eurosh, 1,2 miliardë euro neto fitim. Gjithsej është parashikuar që të ndërtohen deri në 2,2 milionë metra katror sipërfaqe banimi, brenda vitit 2026.