Anëtarja e Komisionit të Pavarur të Kualifikimit, Etleda Çiftja është paraqitur sot në SPAK për t’u njohur zyrtarisht me akuzën.
Çiftja akuzohet për fshehje pasurie dhe falsifikim dokumenti. Ndërkohë Çiftja vijon të ushtrojë detyrën si anëtare e KPK.
Burime për Tirananews.al bëjnë me dije se Çiftja është paraqitur në SPAK bashkë me avokatin e saj Ermal Yzeiraj dhe ka qëndruar aty vetëm disa minuta.
Kush është Etleda Çiftja?
Çiftja është diplomuar “Jurist” në vitin 1999 në Fakultetin e Drejtësisë, Universiteti i Tiranës. Znj. Çiftja është juriste me më shumë se 16 vjet eksperiencë, kryesisht në sektorin e ndërtimit, pronave, kuadrit rregullator për lejet dhe licencat në fusha të ndryshme të ligjit.
Karrierën e saj, Çiftja e ka nisur si ndihmëse ligjore në një zyrë avokatie. Për periudhën 2001- 2009, znj. Çiftja ka punuar pranë kompanisë greke “Egnatia O.Albania”, pjesë e grupit të kompanive greke “Egnatia Group of Companies” , në pozicionin e këshilltares së përgjithshme/drejtores ligjore dhe rregullatore për zbatimin e projektit të përhapjes së rrjetit të telefonisë celulare.