Të notosh në bregdet me ujë të nxehtë mund të duket tërheqëse gjatë pushimeve, por për shkencëtarët ky fenomen mund të rezultojë me pasoja shkatërruese për jetën detare. Rrezikun më të madh po e përjeton Deti Mesdhe, ku temperatura e sipërfaqes së ujit ka kaluar 30 gradë Celsius.
Rasti shqetësues, thotë BBC, është shënuar pranë brigjeve të Majorkës në fund të qershorit dhe në fillim të korrikut, duke bërë që uji i Detit Mesdhe të ishte edhe më i ngrohtë se ai i pishinës.
Për studiuesit e ujërave, kjo ka qenë vala më ekstreme e nxehtësisë detare në Mesdheun Perëndimor e regjistruar ndonjëherë, duke prekur zona të mëdha të detit për javë të tëra.
Sipas tyre, kjo valë të nxehti ka krijuar vështirësi tek disa specie ujore të cilat nuk mund të përballojnë një ngrohtësi kaq të zgjatur dhe intensive, me efekte negative për rezervat e peshqve.
Por temperaturat e larta të ujit mund të paraqesin edhe kërcënime të fshehura. Bakteret dhe algat e dëmshme shpesh përhapen më lehtë në ujin e detit, pasi nuk trajtohet me kimikate pastrimi si pishinat.
Shërbimi evropian i klimës thotë se valët e nxehtësisë detare po bëhen më intensive dhe më të gjata, dhe se numri i ditëve me nxehtësi ekstreme të sipërfaqes së detit në nivel global është trefishuar gjatë 80 viteve të fundit, sipas një studimi të publikuar më parë këtë vit.
Mesdheu është kryesisht më i prekshmi, pasi ky det është si një vaskë e rrethuar nga kontinente dhe jo nga oqean i hapur, dhe për këtë arsye është “një pikë e nxehtë e ndryshimeve klimatike”.