Prej ditësh banorët e qytetit të New York-ut në Shtetet e Bashkuara të Amerikës po përballen me ajrin e rrezikshëm të shkaktuar nga zjarret në Kanada. Një re smogu ka vënë nën alarm për cilësinë e ajrit e afro 8.5 milionë njerëzve.
Qytetarët janë këshilluar të shmangin daljet jashtë dhe të mbajnë maska. Mediat e huaja ndajnë foto të skenës “apokaliptike”. Shkak i smogut janë bërë zjarret në Kanada, ku vendi po përballet me sezonin e tij më të keq të zjarreve në histori. Nxehtësia dhe thatësira kanë sjellë nisjen e sezonit të zjarreve në pyje më herët këtë vit.
Rreth 3.3 milionë hektarë pyje janë djegur tashmë, gati 13 herë më shumë se mesatarja e 10 viteve të fundit dhe mbi 120 mijë njerëz janë detyruar të lënë shtëpitë.
