Një shtetas amerikan i evakuuar nga anija turistike MV Hondius ka rezultuar pozitiv me hantavirus, ndërsa një tjetër paraqet simptoma të lehta, njoftuan autoritetet shëndetësore në Shtetet e Bashkuara.
Dy pasagjerët ndodheshin në një fluturim riatdhesimi të organizuar nga qeveria amerikane dhe po transportohen në njësi të posaçme izolimi biologjik si masë paraprake. Sipas Departamentit Amerikan të Shëndetësisë, të 17 qytetarët amerikanë që ndodheshin në fluturim do t’i nënshtrohen kontrolleve të mëtejshme mjekësore pas mbërritjes në një strukturë shëndetësore në Nebraska.
Pasagjerët janë pjesë e mbi 90 personave që ndodheshin në bordin e anijes turistike, e cila aktualisht është ankoruar në Ishujt Kanarie, pas shpërthimit të virusit. Deri tani janë konfirmuar tre viktima, një çift holandez dhe një grua gjermane, ndërsa dy prej tyre rezultuan pozitivë me hantavirus.
Sipas Organizatës Botërore të Shëndetësisë, disa nga pasagjerët dyshohet se janë infektuar me variantin “Andes” të hantavirusit gjatë qëndrimit në Amerika e Jugut. Ky variant konsiderohet i rrallë pasi mund të transmetohet edhe nga njeriu te njeriu.
Simptomat e virusit përfshijnë temperaturë të lartë, lodhje ekstreme, dhimbje muskulore, probleme me stomakun, të vjella, diarre dhe vështirësi në frymëmarrje.
Kreu i OBSH-së, Tedros Adhanom Ghebreyesus, paralajmëroi se mosndjekja e udhëzimeve të organizatës nga Shtetet e Bashkuara mund të sjellë rreziqe shtesë. OBSH rekomandon izolim 42-ditor për personat që largohen nga anija, ndërsa drejtuesi i përkohshëm i CDC-së, Jay Bhattacharya, deklaroi se nuk duhet krijuar panik publik, pasi transmetimi nga njeriu te njeriu mbetet i rrallë
Ndërkohë, disa vende europiane kanë nisur procedurat e izolimit për qytetarët e kthyer nga anija. Në Franca, një grua e kthyer nga udhëtimi rezultoi pozitive dhe ndodhet në izolim në Paris.