I mandatuari si kryeministër i Kosovës Albin Kurti është shprehur se ndër temat që ka diskutuar me homologun Edi Rama, në takimin 5 orësh të dy ditëve më parë në Tiranë, ka qenë dhe taksa e kalimit në “Rrugën e Kombit”.
Në një intervistë për Ora News, Kurti ka thënë se tarifa është shumë e rëndë ndaj duhet një zgjidhje alternative e saj.
Ora News: Po sa i përket ekonomisë, do të doja të ndalesha tek teza juaj për një treg të përbashkët Shqipëri-Kosovë. Ju keni qenë edhe kundërshtar i traut. A ishte pjesë e bisedës, çështja e traut, me kryeministrin Edi Rama?
Albin Kurti: Ne kemi hapur çështjen e bashkëpunimit ekonomik dhe liberalizimit të tregut, dhe heqjen e barrierave tregtare. Dhe unë kam shprehur qëndrimin tonë se ndërkohë që e kemi një kufi të padrejtë administrativ, ta kemi dhe një pengesë shtesë për të cilën duhet të paguash. Është shumë e rëndë për qytetarin shqiptar, prandaj unë angazhohem për një zgjidhje alternative të kësaj. E kemi hapur si temë, por edhe kjo është një temë që nuk e kemi mbyllur.