Ish-kreu i opozitës ruse, Alexei Navalny ka vendosur ta apelojë vendimin e dënimit me nëntë vjet burg i cili iu dha në mars, me akuza që ai dhe aleatët e tij thonë se janë të motivuar politikisht, raporton AFP.
Seanca dëgjimore e tij të martën vjen pasi autoritetet ruse kërkojnë të heshtin kritikët e mbetur të qeverisë dhe Moska vazhdon me fushatën e saj ushtarake në Ukrainën fqinje, me mijëra të vrarë dhe 10 milionë të zhvendosur.
Navalny njihet si një kritiku më i madh i Kremlinit. Në fund të muajit mars, atij i’u zgjat dënimi me nëntë vjet pasi ai u shpall fajtor për përvetësim dhe shpërfillje të gjykatës.
Ai tashmë po vuan dënimin fillestar me 2 vjet e gjysmë në një burg 100 kilometra në lindje të Moskës për shkelje të lirimit me kusht me akuza të vjetra mashtrimi.
Të martën, Navalny do të apelojë kundër zgjatjes së afatit të tij të burgimit. Nëse dënimi i tij i ri hyn në fuqi, politikani 45-vjeçar i opozitës do të transferohet në një burg të rreptë, gjë që do ta vendosë atë në kushte shumë më të rënda.
Dënimi i ri do të zëvendësojë atë të vjetër, që iu dha në shkurt të vitit të kaluar, që do të thotë se Navalny do të qëndrojë pas hekurave për tetë vjet të tjera.
Si pjesë e akuzave të reja, hetuesit akuzuan Navalny për vjedhje për përdorim personal të donacioneve në vlerë prej disa milionë dollarësh që iu dhanë organizatave të tij politike.