Nënkryetari i Partisë Demokratike Enkelejd Alibeaj deklaroi se nëse Rama nuk do të paraqitet para komisionit hetimor të ngritur nga Kuvendi, do të jetë detyra e policisë ta sjellë atë aty.
“Ka hequr të drejtën e emigrantëve për të votuar. Mjafton kjo për të thënë se zgjedhjet janë cënuar. Pse shpërndau miliona euro 2-3 muajt e fundit ndërkohë që i la 2 dimra në çadra? Në momentin që bie një fatkeqësi ndihma e qeverisë duhet të jetë e menjëhershme. Javët e fundit janë dhënë para jo vetëm për ata që janë dëmtuar. Përse jepet vetëm pak kohë para zgjedhjeve? Është mburrur për të gjitha fondet që BE-ja dha. Si ka mundësi që bën 13 mijë punësime para zgjedhjeve me kontrata të përkohshme ndërkohë që shqiptarët po ikin nga papunësia? Ne kemi filluar këtë komision për të hedhur dritë. Dhe përse të dhënat tonë duhet të jenë në dorë të PS-së para zgjedhjeve? Opozita është e vjedhur, është terrorizuar dhe ka të drejtën e saj të bëjë transparencë për sa kohë që sistemi i drejtësisë nuk e bën. Unë besoj që një shtet anëtar i NATO-s një shtetar e ka për detyrim moral që nevojës së kërkesës dhe fakteve se ka shkelur ligjin të vijë të përballet. Është detyra e policisë që ta sjellë para parlamentit”- tha ai.
Më tej Alibeaj ka akuzuar mazhorancën për ndryshimin e Kushtetutës, ndërkohë që u shpreh se ajo do të rivendoset dhe bashkë me të do të kërkohet edhe një reformë zgjedhore.