Kandidati socialist për Bashkinë e Matit Altin Bojni ka takuar ditët e fundit strukturat socialiste të qytetit Burrelit. I shoqëruar nga deputeti i Qarkut të Dibrës Agron Malaj ai ka falenderuar çdo socialist të kësaj bashkie dhe qytetarët për mbështetjen masive.
Bojni nëpërmjet një deklarate në rrjetet sociale shpreh falenderim për Kryesinë e PSSH-së, kryetarin Edi Rama dhe për ish kryetarin e bashkisë Agrom Malaj që ka kontribuar fort për zhvillimin e Matit.
Ai premton se projektet e nisura nga qeveria Rama dhe ish kryetari Malaj do të vijojnë edhe gjatë mandatit të tij.
Postimi i Bojnit:
Të nderuar bashkëqytetarë të Matit,
Me përulësi dhe ndjenjën e një përgjegjësie të madhe, dëshiroj të ndaj me ju mirënjohjen time më të sinqertë për mbështetjen, besimin dhe fjalët e ngrohta që më keni dhënë gjatë kësaj faze të rëndësishme për mua. Të jem pjesë e kësaj gare për të përfaqësuar interesat tuaja është një nder i veçantë dhe një angazhim që e marr me seriozitetin më të madh. Kjo është për mua gara më e rëndësishme në jetën publike dhe profesionale, dhe jam i vendosur ta çoj përpara me dinjitet, përkushtim dhe transparencë.
Një falënderim i veçantë shkon për Kryesinë e Partisë Socialiste të Shqipërisë, në veçanti për Kryeministrin Edi Rama, për besimin e treguar në këtë proces. Po ashtu, shpreh mirënjohjen time për deputetin e Qarkut të Dibrës, z. Agron Malaj, një figurë që ka kontribuar ndjeshëm për zhvillimin e Matit dhe që mbetet një pikë referimi për të gjithë ne.
Jam thellësisht mirënjohës ndaj strukturave të Partisë Socialiste në Mat dhe gjithë atyre që po më mbështesin në këtë rrugëtim. Pa mbështetjen dhe energjinë tuaj, ky angazhim nuk do të kishte të njëjtën forcë dhe kuptim.
Gjatë gjithë karrierës sime në administratë dhe institucione shtetërore, kam bërë përpjekje të pandërprera për të qenë në shërbim të qytetarëve me përulësi dhe profesionalizëm. E njëjta frymë do të më udhëheqë edhe në këtë sfidë: t’u shërbej njerëzve të Matit me zemër të hapur dhe me vëmendje ndaj çdo nevoje të tyre.
Në takimet e shumta me strukturat vendore të PS-së dhe me qytetarë të thjeshtë, kam ndjerë një energji të jashtëzakonshme dhe një dëshirë të madhe për punë konkrete dhe për një të ardhme më të sigurt. Ky është frymëzimi im më i madh.
Jam i vetëdijshëm për përgjegjësinë që më takon nëse marr mbështetjen tuaj dhe ju siguroj se do të jem çdo ditë pranë jush, me punë dhe angazhim të palodhur, për ta bërë Matin më të mirë, më të zhvilluar dhe më të bashkuar.
Së bashku mund të bëjmë shumë. Së bashku mund të ndërtojmë një Mat që reflekton vlerat, potencialin dhe dinjitetin e njerëzve të tij.
Me respekt të thellë dhe besim të palëkundur,
Altin Bojni