Takimet e kandidatit të Partisë Socialiste për Bashkinë e Matit, Altin Bojni, kanë vijuar me një bashkëbisedim të ngrohtë me Forumin e Gruas Socialiste në Burrel. Gratë dhe vajzat matjane, të angazhuara prej vitesh në mbështetje të së majtës, dëshmuan edhe një herë se janë një shtyllë e fortë e fitores socialiste në këtë bashki.
I pranishëm në takim, deputeti i Qarkut të Dibrës, Agron Malaj, falënderoi gratë socialiste për angazhimin e tyre të pandërprerë dhe theksoi peshën e kësaj fushate për të ardhmen e Matit.
“Nuk është thjesht një garë për të zgjedhur një kryetar bashkie. Kjo është një betejë për të garantuar vazhdimësinë e zhvillimit të Matit, për të çuar përpara punët që kemi nisur. Na presin sfida të reja, ndaj mbështetja juaj është më e rëndësishme se kurrë,” deklaroi Malaj.
Në fjalën e tij, kandidati socialist Altin Bojni falënderoi gratë e Matit për besimin dhe kontributin e tyre të çmuar ndër vite, duke e cilësuar mbështetjen e tyre si një nder dhe përgjegjësi të madhe.
“Ne duhet të punojmë fort për veten, për familjet tona dhe për Matin që po ndryshon dita-ditës. Kemi bërë hapa të mëdhenj përpara dhe këtë rrugëtim do ta çojmë deri në fund. Së bashku do të arrijmë një fitore të thellë,” u shpreh Bojni.
Kryetari i PS-së Mat, Hasan Pasha, vlerësoi rolin e grave si një nga motorët më të fuqishëm të organizimit dhe fitores socialiste.
“Gratë e Matit janë një forcë serioze dhe e vendosur në strukturat tona. Ato jo vetëm që përfaqësojnë shumicën në administratën lokale, por janë edhe zëri i së majtës progresiste në këtë bashki dhe më gjerë,” – u shpreh Pasha, duke nënvizuar rëndësinë e një fushate të fokusuar dhe të përkushtuar që të kurorëzohet me sukses më 9 nëntor.
Ky takim konfirmoi edhe një herë frymën e bashkëpunimit, energjinë dhe unitetin e strukturave socialiste në prag të zgjedhjeve, duke dhënë sinjale të qarta për një fitore të bindshme të Partisë Socialiste në Mat.
