Pas një eventi me zyrtarë, investitorë shqiptarë dhe amerikanë, ambasada e SHBA ka përcjellë një mesazh, teksa thekson se reforma në drejtësi është thelbësore për tërheqjen e investimeve të huaja.
Në mesazhin e publikuar theksohet gjithashtu se zgjidhja e të drejtave të pronësisë do të tërheqë më shumë investime.
“Teksa kremtojmë 100 vjetorin e marrëdhënieve diplomatike, ne festojmë nivele rekord të tregtisë dhe investimeve midis Shteteve të Bashkuara dhe Shqipërisë. Ne do të vazhdojmë të punojmë ngushtë me drejtues biznesi, zyrtarë të qeverisë dhe të tjerë për të rritur tregtinë dhe investimet, dhe përgjatë këtij procesi duke krijuar më shumë vende pune, zhvillim dhe mundësi të barabarta për amerikanët dhe shqiptarët. Reforma në drejtësi është thelbësore për këtë përpjekje, sepse investuesit duhet të kenë besimin se rregullat janë të qarta, transparente dhe zbatohen në mënyrë të barabartë për të gjithë. Edhe zgjidhja e të drejtave të pronësisë gjithashtu do të tërheqë më shumë investime.”