Ambasada e SHBA-ve në Tiranë ka shpërndarë një mesazh urimi për të gjithë besimtarët, në këtë ditë të shënuar të Fitër Bajramit.
“Ne përcjellim urimet tona më të ngrohta për një Fitër Bajram të bekuar të gjithë atyre që festojnë.”, thuhet në mesazhin e ambasadës, e cila këtë urim e shoqëron edhe me një mesazh nga presidenti Donald Trump dhe bashkëshortja e tij Melania.
“Fitër Bajrami, e njohur gjithashtu si Festa e Prishjes së Agjërimit, bashkon familjet, miqtë dhe komunitetet myslimane në nder të përkushtimit të tyre shpirtëror në përfundim të muajit të Ramazanit. Ai shërben gjithashtu si një kujtesë e parimit themelor amerikan të lirisë fetare, për të cilin Administrata ime lufton çdo ditë.”, thuhet në mesazhin presidencial.
Pas një muaji përkushtimi, sakrifice dhe adhurimi ndaj Zotit përmes agjërimit të Ramazanit, këtë të premte besimtarët myslimanë në mbarë botën kremtojnë festën e shenjtë të Fitër Bajramit ose siç njihet ndryshe, Bajramin e Madh.
Në Tiranë, ceremonia e madhe e faljes së namazit u zhvillua në sheshin “Skënderbej”, ku mijëra besimtarë u mblodhën për të festuar së bashku këtë ditë të shenjtë, në një atmosferë paqeje, bashkimi dhe shprese.