Sot shënohet 27-vjetori i vrasjes së Paolo Borsellinos, një nga prokurorët më në zë italianë që luftoi mafian, e që mbeti viktimë e dorës së tyre.
Luigi Soreca, ambasadori i BE-së në Tiranë, ka vendosur të përkujtojë vrasjen e njeriut të drejtësisë për të thënë se lufta për një botë më të mirë është një detyrim moral për të gjithë ne.
“27 vjet më parë mafia vrau Paolo Borsellinon dhe 5 policë. Çdo 19 korrik, në orën 16:58, mendja jonë shkon prapa në ato momente të tmerrshme. Mësimi i tij, fjalët e tij janë ende me ne, për të kujtuar se lufta për një botë më të mirë është një detyrim moral për të gjithë ne”, shkruan Soreca në mesazhin e tij në Twitter që e shoqëron me një thënie të Borsellinos.
Bashkë me Giovanni Falconen, ata u bënë “heronjtë” e drejtësisë në Itali në vitet ’90. Borsellino u vra dy muaj pas Falcones nga mafia, më 19 korrik 1992.