Ambasadorja e SHBA, Yuri Kim është takuar këtë të martë me ministrin e Mbrojtjes, Niko Peleshi. Në fokus kanë qenë sulmet kibernetike nga Irani.
Ka qenë vetë diplomatja amerikane ajo që ka zbardhur bisedën me ministrin Peleshi.
“Sot u takova me Ministrin e Mbrojtjes Niko Peleshi për të diskutuar bashkëpunimin në mbrojtje midis SHBA dhe Shqipërisë, përfshirë forcimin e mbrojtjes kibernetike të Shqipërisë. Udhëheqësit e Shteteve të Bashkuara, përfshirë Sekretarin e Mbrojtjes në Ministerialin e NATO-s në tetor – e kanë bërë të qartë që ne i dënojmë sulmet kibernetike të ndërmarra nga Irani ndaj aleates sonë të NATO-s. SHBA do mbështesin gjithnjë me forcë përpjekjet e Shqipërisë për të mbrojtur popullin dhe territorin e saj, dhe për të kontribuar në qëllimin e NATO-s për të garantuar lirinë dhe sigurinë e të gjithë aleatëve”, shkruan ambasadorja Yuri Kim.