Ditën e enjte pas takimi me kryeministrin Edi Rama, delegacioni i Bashkimit Europian në Tiranë, tha se BE ka shqetësime serioze rreth draftit aktual të ligjit të amnistisë fiskale.
Por zv/ministri i Financave dhe Ekonomisë, Besart Kadia, thotë se amnistia fiskale është instrument “që përdoret nga administrata tatimore ose nga një shtet për të adresuar disa problematika të vetat” dhe shtoi se qeveria nuk është në “përplasje” me Bashkimin Europian për këtë projektligj.
“Të mos harrojmë që amnistia fiskale është një praktikë që nuk është shpikur në Shqipëri dhe nuk është hera e parë që diskutohet për të në vendin tonë. Nuk ka të bëjë me kahe politike, por është një ndër instrumentat që përdoret nga administrata tatimore ose nga një shtet për të adresuar disa problematika të vetat. Që nga rënia e komunizmit, ka shumë shqiptarë që kanë emigruar në mënyrë informale. Pasuria që kanë krijuar ndër vite, mund të deklarojnë deri në 2 milionë euro”.