Angela Merkelit i ka përfunduar zyrtarisht mandati si kancelare e Gjermanisë. Këtë të martë, ajo mori certifikatën e saj të shkarkimit nga posti i kancelares pas 16 vjetësh në detyrë, megjithëse ajo do të drejtojë një qeveri të përkohshme derisa të betohet pasardhësi i saj.
Presidenti i Republikës së Gjermanisë, Frank-Walter Steinmeier e ka falënderuar për punën kancelaren gjermane, e cila ishte në këtë post prej vitit 2005.
“Kjo kancelari ishte një nga më të rëndësishmet në historinë e republikës”, tha Steinmeier në Bundestag, duke i dorëzuar asaj një dokument për përfundimin e kompetencave të saj.
Sot është mbajtur seanca e parë organizative e parlamentit të ri gjerman, të cilin do ta drejtojë Barbel Bas, raporton Washington Post.
Merkel dhe anëtarë të tjerë të qeverisë gjermane do të punojnë tani si ministra në detyrë, derisa Gjermania të marrë një qeveri të re, që pritet të drejtohet nga Olaf Scholz.
