Anglia do të ndalojë shitjen e pijeve energjike me përmbajtje të lartë kafeine për personat nën 16 vjeç, duke nisur nga prilli i vitit 2027.
Masa përfshin pijet me më shumë se 150 miligramë kafeinë për litër dhe do të zbatohet në supermarkete, dyqane, restorante, platforma online dhe makina automatike. Mes markave të prekura janë Red Bull, Monster, Relentless dhe Prime Energy.
Sipas të dhënave të autoriteteve shëndetësore britanike, një në tre fëmijë në Mbretërinë e Bashkuar konsumon të paktën një pije energjike çdo javë. Disa prej këtyre produkteve përmbajnë sasi kafeine të barabarta me dy filxhanë kafe ose katër kanaçe pije kola.
Ministrja britanike e Shëndetit Publik, Sharon Hodgson, deklaroi se pijet me përmbajtje të lartë kafeine “nuk kanë vend në duart e fëmijëve“.
“Ato mund të shkaktojnë ankth, të dëmtojnë gjumin dhe përqendrimin, si edhe të ndikojnë negativisht në rezultatet e tyre në shkollë. Ky ndalim është një hap i rëndësishëm për mbrojtjen e shëndetit dhe mirëqenies së fëmijëve,” u shpreh ajo.
Qeveria britanike thotë se ndalimi synon të mbrojë shëndetin e fëmijëve, pasi konsumi i lartë i kafeinës lidhet me ankthin, problemet e gjumit dhe vështirësitë në përqendrim.