Komisioni Shtetëror i Zgjedhjeve Ilirjan Celibashi në një letër dërguar Kolegjit Zgjedhor i kërkon këtij të fundit që të shqyrtojë sa më shpejt ankimin e PS për listat zgjedhore të PD-së, që ti hapet rrugë kështu dhe miratimit të fletës së votimit.
“Pa cënuar pavarësinë e Kolegjit Zgjedhor dhe duke respektuar paanësinë tuaj në vendimmarrje kërkojmë nga ana juaj përshpejtimin e shqyrtimit të ankimit kundër vendimit nr. 9, datë 23.03.2021, “Për shqyrtimin e kërkesës ankimore nr. 05, datë 19.03.2021 të Koalicionit Partia Demokratike- Aleanca për Ndryshim PD-AN me objekt: kundërshtimin e vendimit nr. 156, datë 17.03.2021 të Komisionerit Shtetëror të Zgjedhjeve”, të Komisionit të Ankimimeve dhe Sanksioneve, për arsye se çdo vonesë krijon pamundësinë e miratimit të përmbajtjes së fletës së votimit, e cila ndikon në procesin e prodhimit dhe shpërndarjes së fletëve të votimit brenda afateve të caktuara në ligjin nr. 10019, datë 29.12.2008, “Kodi Zgjedhor i Republikës së Shqipërisë”, i ndryshuar”, thuhet në letrën e tij.
