Gjykata e Apelit Tiranë ka vendosur ndryshimin e masës së sigurimit ndaj producentit Petri Bozo, duke zëvendësuar “arrestin në burg” me “arrest në shtëpi” dhe duke urdhëruar lirimin e tij të menjëhershëm nga paraburgimi.
Vendimi i Apelit erdhi pas kërkesës së paraqitur nga mbrojtja e Bozos për zëvendësimin e masës së sigurisë. Kërkesa ishte shqyrtuar fillimisht nga Gjykata e Elbasanit, e cila e kishte rrëzuar duke lënë në fuqi masën “arrest në burg”.
Pas ankimit të mbrojtjes, çështja kaloi për shqyrtim në Gjykatën e Apelit Tiranë, e cila vlerësoi ndryshe kërkesën dhe vendosi një masë më të lehtë sigurie.
Petri Bozo ishte vendosur në “arrest në burg” nga Gjykata e Elbasanit pas kërkesës së organit të akuzës. Prokuroria kishte paraqitur para gjykatës provat dhe argumentet mbi të cilat mbështeste kërkesën për masën e sigurisë.
Kërkesa ishte pranuar nga gjykata dhe producenti kishte qëndruar për disa javë në paraburgim.
Në momentin e caktimit të masës së sigurisë, avokatët e Bozos e kishin kundërshtuar vendimin dhe kishin kërkuar aplikimin e një mase më të lehtë, por Gjykata e Elbasanit kishte vendosur lënien e tij në burg.
Me vendimin e ri të Apelit, situata juridike e producentit ndryshon, pasi ai do ta vijojë masën e sigurimit në kushtet e “arrestit në shtëpi”.
Çështja penale ndaj Petri Bozos vijon të jetë në shqyrtim, ndërsa ndryshimi i masës së sigurimit nuk përbën vendim përfundimtar mbi fajësinë apo pafajësinë e tij.