Më 11 dhjetor të vitit 1990, Ramiz Alia, Skënder Gjinushi dhe Lisien Bashkurti, zhvilluan një takim me studentët.
Ish-dhjetoristi Arben Demeti ka risjellë kujtimet 33 vite më pas.
“Përveç studentëve kishte edhe pedagogë, ku unë mund të përmend Gramoz Pashkon nga Fakulteti i Ekonomisë, që ishte një i spikatur. Në Akademinë e Arteve ishte Edi Rama. Në Fakultetin e Inxhinierisë isha unë, që për disa arsye isha bërë një figurë e njohur dhe e respektuar…”, shprehet ndër të tjera Arben Demeti, një nga ish-dhjetoristët protagonistë.
Vetëm disa orë para takimit (11 dhjetor paradite), siç tregon ai, studentët ishin grumbulluar në sheshin “Demokracia”, ku disa prej pedagogëve që mbajtën fjalime, përfshirë Hamit Beqjan dhe Sali Berishën u kishin kërkuar të ktheheshin në auditorë, pa hequr dorë nga lëvizja.
“Ata folën shtruar, folën mirë. I përkrahën studentët, qëllimin e tyre, por në fund u kërkuan me mirëkuptim, e vazhdoni lëvizjen, por të kthehemi në mësim. Dhe, në momentin që Sali Berisha u tha (ndonëse butë) ‘shkoni në mësim’, Bledi Gonxhja i mori mikrfonin nga dora dhe e larguan”, tha më tej Demeti për Report tv.
Studentët nuk hoqën dorë, derisa arritën tek takimi me ish-presidentin. Një delegacion që fillimisht u kërkua me 45 vetë, më pas me 30 ( pjesë e të cilit) studentë e pedagogë, do të shkonte me një autobuz në pritjen që ndonëse u tha se do mbahej në Pallat të Kongreseve, u organizua në Pallatin e Brigadave. Por, ngjarja e mëhershme, do të ndikonte që Berisha të mos pranohej në delegacion.
“Ata që u zgjodhën u mblodhën tek godina 15 tek salla e RTSH, në kat të parë dhe aty po diskutonin për dy orë, për të rakorduar mbi qëndrimet që do të mbaheshin. Në këtë moment vijnë nga jashtë edhe Sali Berisha edhe Gramoz Pashko për të hyrë brenda, por nuk i pranuan. Madje Arben Imami që po drejtonte mbledhjen bashkë me Azem Hajdarin i tha: Gramozi le të hyjë, Saliu të mos hyjë! Dhe nuk u pranua që të hynte brenda”, shprehet Demeti.
Lajmi i pluralizmit u transmetua edhe përmes televizionit, ndërkaq që studentët prisnin përfaqësinë e tyre në shesh. Arben Demeti tregon një copëz nga fjalimi i Berishës në atë rast.
“Pasi erdhëm nga andej, ishim shumë entuziast për shkak se u arrit pluralizmi politik, ne kishim caktuar Arben Imamin i cili foli dhe tha një fjalë të vogël përshëndetëse. Dhe, ndërkohë Sali Berisha kishte përgatitur një fjalim me shkrim, doli dhe mbajti dhe fjalimin. Natyrisht që në kuadrin e këtij entuziazmi u gjithëpranua, paçka në fjalim thuhej ndër të tjera ‘një falënderim i veçantë shkon për presidentin Ramiz Alia, i cili ka udhëheq proceset demokratike”, shprehet më tej Demeti.