Një nga punonjësit më të njohur të Policisë dhe të Prokurorisë, Arben Frashëri, është shkarkuar nga detyra me pretendimin se nuk justifikon paratë për blerjen e apartamentit. I njohur në ngjarjet e vitit 1997 në Berat, ai ishte ndër të paktit që qëndroi në detyrë mes bresherive të armëve, ndërkohë që më pas punoi edhe në Tropojë për disa muaj. Frashëri njihet edhe si oficeri që u angazhua në hetimet e ngjarjeve më të bujshme, si Gërdeci, bandat e Lushnjes, Cërrikut, Elbasanit, Tiranës.etj. Një prej gazetarëve më të njohur të kronikës Sokol Çobo, e cilëson “lemeri” trajtimin që i është bërë një punonjësi të tillë duke nxjerrë të papunë, edhe pse ka rrezikuar jetën e tij dhe të familjes për të luftuar bandat më famëkeqe të viteve 2000.
Lexo edhe- Ngec në “sitën” e vetingut drejtori i drejtorisë rajonale të SHÇBA për Fier-Berat
POSTIMI I SOKOL COBO
Sot, ditë zie për Drejtësinë Shqiptare!
Një nga punonjësit më të zellshëm të Policisë dhe Prokurorisë u largua nga detyra! Arben Frashëri, që të gjithë e njohin për ngjarjet e vitit 1997 në Berat, një ndër të paktit që qëndroi në detyrë mes breshërive të armëve, u shkarkua se nuk justifikoi paratë për të blerë një strehë për familjen.
Arbeni nuk ishte pronar apo aksioner në ndonjë firmë! As me shtëpi të dyta, treta, vila në resortet më të mira në Shqipëri. Benin e njohin të gjithë për vendosjen e rendit pas trazirave të vitit 1997! La Beratin dhe qëndroi në Tropojë për muaj me radhë. Flinte në komisariat me armë poshtë dyshekut. U zhvendos në Tiranë dhe vuri pas hekurave bandat më famëkeqe të viteve 2000, anëtarët e të cilave ende sot nuk përmenden nga politika.
U angazhua në hetimet e ngjarjeve më të bujshme; Gërdecin! Ndër të vetmit që tentonte të futej në fshatin e rrënuar. Të sekuestronte armët e gardistëve. Apo edhe provat në Ministrinë e Mbrojtjes. Hetoi në Prokurorinë e Krimeve të Rënda bandat e Durrësit, Lushnjes, Cërrikut, Elbasanit, Tiranes…etj etj. Të gjitha dosjet e bujshme kanë në aktet e tyre emrin e Arben Frashërit.
Dhe, pasi i ke dhënë shtetit gjithçka, duke rrezikuar jetën e tij dhe të familjareve, largohet se nuk justifikoi shtëpinë. Lemeri!