Kryetari i Federatës Shqiptare të Futbollit, Armando Duka ka komentuar, vendosjen e tritolit në portën e shtëpisë së tij para pak muajsh. Duka u shpreh se për mendimin e tij ky akt mund të ketë qenë inspirim nga kryebashkiaku i Tiranës, Erion Veliaj. Zyrtarisht nga hetimet ende nuk është arritur një konkluzion konkret.
“Nuk arrij ta gjej te komuniteti i futbollit, edhe pse kam kundërshtarë që nuk mendojmë njësoj dhe mund të kemi debate. Fakti që i gjithë komuniteti i futbollit u bashkua me mua do të thotë se s’kam pasur asnjë gabim.
Unë nuk harxhoj kohë, do të shoh punët e mia. Nëpërmjet mekanizmave joligjorë mund të bëjnë çdo gjë. Nëse ti me mjete joligjore përdor kompetenca që nuk të takojnë, mund ta bësh.
Nuk ishte një gjë që e prisja, tritolin në shtëpi. Mendoj se nuk është autor i ngjarjes as Erion Veliaj as ndonjë tjetër i qeverisë. Por deklaratat që bënte ai ishin dyshuese. Ka qenë inspirim nga Veliaj, kështu mendoj. Nga hetimet nuk ka sinjale se kush mund të ketë qenë,” – tha ndër të tjera Duka.