Ditën e premte, dy mjekë dhe një infermiere u arrestuan brenda ambienteve te Spitali i Traumës, pasi akuzohen se iu kanë marrë ryshfet pacientëve.
Shoqata e Anestezistëve dhe Reanimatorëve të Shqipërisë kanë reaguar pas kësaj ngjarjeje, duke thënë se çdokush që shkel ligjin do të duhet të dënohet. Mirëpo, kundërshtojnë pamjet e operacionit.
Në reagim theksohet se operacione të tilla nuk janë parë as në momentet e kapjes së një krimineli të madh, duke shtuar se mjeku do ishte paraqitur vetë me një fletëthirrje në organet kompetentë.
“Shoqata e Anestezistëve dhe Reanimatorëve të Shqipërisë po ndjek me shumë vëmendje rastin e ndalimit të kolegut tonë anestezist në Spitalin e Traumës, F.M. Ndërkohë që mbështesim çdo veprim të organeve ligjzbatuese për hetimin dhe ndëshkimin e çdo shkeljeje të kryer nga kushdo gjatë ushtrimit te detyrës, shprehim shqetësimin tonë për mënyrën denigruese të ndalimit të mjekut. Pamje të tilla, të bëra publike, ku mjeku me uniformë shoqërohet nga policë të maskuar nuk i shërbejnë askujt që kërkon me të vërtetë përmirësimin e shërbimit shëndetësor në vend. Vlen të kujtojmë se operacione të tilla, të organizuara me kaq bujë mediatike, nuk i kemi parë as në rastet e ndalimit të kriminelëve të rrezikshëm apo zyrtarëve të lartë të akuzuar për korrupsion të përmasave të mëdha! Jemi të sigurt që kolegu mjek do të ishte paraqitur pranë organeve përkatëse edhe me një fletëthirrje të thjeshtë. Të mos harrojmë as vijën shumë të hollë që ndan simulimin gjatë hetimit dhe provokimin, gjë që ata që organizojnë operacione të tilla e dinë shumë mirë. Urojmë që kolegu të provojë pastërtinë e figurës së tij, nëpërmjet një procesi të drejtë ligjor.”