Gjergj Cukali është jo pak i njohur në media për arrestimet e bujshme por edhe lirimet nga qelitë pavarësisht shkeljeve të bëra.
Arrestimi i fundit i tij i kryer më 30 maj si i dyshuar për vrasjen e ish-policit Arben Bilali, solli lirimin e tij nga qelitë pas tre muajsh paraburgim.
Në vendimin e Gjykatës së Apelit i siguruar nga “Panorama” thuhet se akti i ekspertimit biologjik krahasues të ADN-së, “është kryer në mënyrë të kundraligjshme nga policia gjyqësore gjatë fazës së hetimit duke shkelur rëndë urdhërimet e dispozitës ligjore dhe përkatësisht të nenit 201/a të Kodit të Procedurës Penale”.
Ekspertimi i përpiluar më datë 30 maj 2019 nga Instituti i Policisë Shkencore është i papërdorshëm. Madje, Gjykata e Apelit thekson se është kryer “shpërdorim i detyrës nga ana e punonjësve të policisë së shtetit”.
“Nga ana tjetër Gjykata e Apelit Tiranë konstaton se nga ana e policisë gjyqësore janë kryer veprime hetimore në kundërshtim me procedurën ligjore, lidhur me këqyrjen dhe marrjen e provave materiale”, thuhet në vendim.
Si u mblodhën provat materiale?
Një ditë pas vrasjes së ish-policit Bilali, më datë 1 shkurt 2019, rreth orës 16:30, rezulton, sipas vendimit të Apelit, se në vendin e quajtur Mjull Bathore është gjetur i ndaluar një autoveturë e markës Mercedes-Benz, me ngjyrë të zezë, me targa AA 757 RU.
“Këqyrja e këtij mjeti dhe sekuestrimi i disa provave materiale te cilat pretendohen nga policia se ndodheshin brenda autoveturës me targa AA757 RU dhe, që kanë lidhje me ngjarjen e ndodhur, vrasjen me armë zjarri të shtetasit Arben Bilali, është bërë në garazhin e mbyllur të Policisë Shkencore ne Drejtorinë Vendore të Policisë Tirane, duke u transportuar ne këtë vend me karotrec nga policia bashkiake”, thuhet në vendim.