Deputeti i Partisë Socialiste, Petro Koçi, i ftuar në studion e emisionit “Frontline” ka folur në lidhje me arrestimin e ish-kryebashkiakut të Durrësit, Vangjush Dako dhe ish-zyrtarëve të tjerë të kësaj bashkie.
Koçi deklaroi se me arrestimin e Dakos rrëzohen totalisht gjithë fjalët se SPAK është në dorën e PS-së, ndërsa tha më tej se ky i fundit nuk ka asnjë rol në pushtet apo detyra politike.
Sipas tij nëse Dako është i deleguar apo ka ndikim politik në Durrës, është diçka që vendoset nga Partia Socialiste, ndërsa shtoi se kjo është një “fabul” që përdoret nga opozita për shkak se ndaj ish-kryebashkiakut të Durrësit ka pasur disa akuza.
Megjithatë, Koçi u shpreh se nëse dikush ka kryer akte që kanë pasur mbrapa korrupsion duhet të ketë ndëshkim, teksa nxiti SPAK të mos druhet se dikush ka qenë kryetar bashkie apo rol tjetër për të vijuar hetimet.
“Rrëzohet totalisht ajo që thonë se SPAK është në dorën e PS. Ka shumë persona nga PS që janë vendosur nën hetime dhe nuk ka pasur zhvillime me rëndësi nga opozita, për të cilën ka shumë akuza publike. Dako nuk është në pushtet, nuk ka asnjë detyrë politike.
Nëse Dako është i deleguar dhe ka ndikim në Durrës, atë e cakton PS, nuk e cakton media. Meqë ka pasur akuza shpesh herë ndaj tij publikisht, përdoret në fushatë kjo fabulë e opozitës. Këto janë pa sens.
Në rastin konkret nëse ekspertiza teknike që ka sjellë firmosje e kateve shtesë është imponuar nga lart përgjegjësia morale është më e madhe. Pjesa penale është çështjes tjetër. Me sa dëgjova bëhej fjalë për legalizim të asaj që ishte bërë.
Vangjush Dako nuk është Sali Berisha. Ku krahasohen dot përgjegjësitë politike të tyre. Në peshoren e personit nuk krahasohen dot, as për non-gratën. Flas si peshë politike. Peshk i madh është Berisha dhe Meta. Peshq të mëdhenj ka plot. Nuk e di kush e ka quajtur cironkë. Për mua çdo akt që ka mbrapa korrupsion duhet ndëshkuar, pavarësisht se kush e bën. Për mua SPAK nuk ka pse druhet se iksi ka qenë kryeministër apo kryetar bashkie.
Zgjedhjet korrën atë që ishte mbjellë për të dyja palët. Pa diskutim që PS është e fortë dhe ka dëshmuar se ka dhënë efekt në qeverisjen vendore”, u shpreh Koçi.