Arrestimi i dy vëllezërve Indrit dhe Gentian Beqiraj, pas incidentit në autostradë ditën e dielë ka sjellë zbulimin e një grupi kriminal në Durrës.
Të paktën 15 persona, të dyshuar për vrasje, raportohet se kanë rënë në prangat e policisë.
Dyshohet se ky grup kriminal është përfshirë në disa ngjarje në Tiranë dhe Durrës, dhe një prej tyre është ekzekutimi i Erion Çelës në 4 janar të këtij viti në Don Bosko.
Pak para se të vritej, viktima me origjinë nga Dibra dhe banues në Maminas, kishte qenë në tavolinë me bashkëshorten e tij shtatzënë. Ajo ishte larguar nga lokali vetëm disa minuta para se autorët të zbraznin kallashnikovin mbi 35-vjeçarin.
Gjatë të shtënave me armë mbeti i plagosur vëllai i viktimës, Blerim Çela, 28 vjeç, daja i tij, Edmond Crroj, kamerieri i lokalit Azbi Selimaj 19 vjeç si edhe Arben Dani 46 vjeç.
35-vjeçari Erion Çela, kishte një dyqan ngjitur me lokalin ku ndodhi ngjarja, në të cilin shiste duhan.